O Centro de Investigación Interdisciplinaria en Tecnoloxías Ambientais (CRETUS) da Universidade de Santiago de Compostela súmase un ano máis á xornada de portas abertas Ciencia Singular, que se celebrará o vindeiro sábado 8 de novembro no marco da Rede de Centros Singulares de Investigación da USC.
Ao longo de todo o día, o centro ofrecerá un amplo programa de conferencias temáticas, charlas de divulgación e obradoiros para o público adulto e infantil, combinando divulgación, participación e aprendizaxe.
A xornada comezará coa benvida da directora científica de CRETUS, Maite Moreira, e continuará cun ciclo de conferencias que abordarán distintos aspectos da crise climática desde unha perspectiva multidisciplinar:
Conferencias:
- A biodiversidade global como obxecto de estudo e conservación, con Carola Gómez-Rodríguez.
- Clima e incendios: interaccións lume-atmosfera e quecemento global, por Gonzalo Míguez.
- Da degradación á restauración: estratexias innovadoras para a recuperación dos solos queimados, a cargo de Juan Antelo.
- Unha ollada desde a psicoloxía social á crise climática, con Cristina Gómez-Román.
Ademáis o público adulto poderá adentrarse nos nosos laboratorios para coñecer algúns dos proxectos de investigación e outras aplicacións prácticas da ciencia ambiental. c
Charlas de divulgación cun compoñente participativo:
- Cando os ósos falan: arqueoloxía e textos antigos entre a vida e a morte.
- PFAS: contaminantes para toda a vida?
- Microalgas e bacterias, un equipo natural para tratar as augas residuais.
- Deseña a túa propia Biorrefinería. Un xogo de construción.
- Valorizando a riqueza oculta nos refugallos agroalimentarios.
- Bacterias con estilo: tecnoloxía sostible para a reciclaxe textil.
Paralelamente, o público máis novo (de 6 a 12 anos) poderá atender os obradoiros de ciencia que combinarán experimentación, xogo e conciencia ambiental:
Obradoiros de ciencia público infantil
- Antropóloga/o por un día
- Aventura microscópica: as cores do bosque
- Elabora o teu propio tecnosol
- Fotocatalizadores ao rescate da auga
- Entre xogos e microplásticos: os segredos dos parques e campos de fútbol
- Explorando paisaxes naturais mediante realidade virtual
- Como podemos aproveitar as bacterias da natureza?
A actividade de CRETUS en Ciencia Singular 2025 forma parte da programación conxunta da Rede de Centros Singulares de Investigación da USC —que tamén integran CiQUS, CiMUS, CiTIUS e IGFAE—, centros que contan co recoñecemento da Rede CIGUS da Xunta de Galicia e o cofinanciamento da Unión Europea a través do Programa Galicia Feder 2021-2027.
As visitas e actividades son de acceso libre previa inscrición, que poderá realizarse desde o mércores 29 de outubro ás 16.00 horas a través da web oficial de Ciencia Singular (cienciasingular.usc.gal)
