O director da Axencia Estatal de Investigación (AEI), José Manuel Fernández de Labastida, visitou este xoves a sede principal de CRETUS, no marco do percorrido institucional que está a realizar polos centros de investigación da Universidade de Santiago de Compostela (USC).
A delegación estivo integrada tamén por Lourdes Armesto López, directora de Xestión Científica e Tecnolóxica da AEI; Gonzalo Arévalo Nieto, asesor do director xeral; María José Mariño Fontenla, directora da Área de Talento e Transferencia da Axencia Galega de Innovación (GAIN); e a vicerreitora de Investigación e Ciencia Aberta da USC, Almudena Hospido Quintana. A comitiva foi recibida pola directora adxunta de CRETUS, Sarah Fiol, e pola xestora tecnolóxica do centro, Sonia Suárez.
Durante a visita, a delegación percorreu as instalacións de CRETUS para coñecer de primeira man a actividade científica que desenvolve o centro, as súas infraestruturas de investigación e algúns dos seus proxectos máis destacados, entre eles dúas iniciativas financiadas polo European Research Council (ERC). O percorrido permitiu presentar o modelo de investigación de CRETUS, baseado nun enfoque interdisciplinario e holístico que integra coñecementos de distintas áreas para abordar a complexidade dos retos ambientais.
Grazas á Axencia Estatal de Investigación polo interese mostrado no noso traballo e por achegarse a coñecer a investigación que desenvolvemos como un dos dez centros que integran a Rede CIGUS.
